Dongeng Badranaya

Dening : Didit Setyo Nugroho

Nalika paraga waktu kuwi lair saka guwa garbaning bumi

Dadi trawaca bedane : kadewatan kaprasajan lan angkara murka “ celathuku

Ndongengake anakku

Semar wewujudane rakyat nalika katindhes bisa dadi bathara luwih kuwasa

Luwih eksekutif lan eksklusif tinimbang sapa wae

Aku nerusake critakukanthi rasa bombong

Dak gathekne mripat bocahku isih bening

Semar kuwi imbul, wewarah moral, pepeling kekuwatan kang ora rusak katrajang rodha zaman

Kang kadhempel sing dadi jagad cilike penguwasa sing nulak foedal

Aku mandheg

Anakku turu

Ing tangane nggegem boneka pokemin

                                           Rasa Risi Ora Ditiliki          

Dening : Hari Dwinarko

Rumangsa bisa kuwi mung ngisin-ngisini yen konangan

Amarga saben wewadi kawiyak polahe dhewe

Sangsaya ndadra tan dirasa ngambra-ambra kawirangan

Asah asih asuh ayo dha andum kang piguna mring sapepadha

Rereged kang ana ayo disirnakna

Isih ana lan tetep ana kang Murbeng Dumadi

Sisihna wektu kanggo wewening ing rasa karsa kang tumata

Irah-irahan kang ana ayo diupaya becik

Sunar surya katon cetha wela-wela

Unggah-ungguhing basa lan sopan santun wus meh kalis

Wato krungu suwara wus bakal kawentar adoh padha krungu

Eman temen yen durung ngerti sejatine ana perkara kang ngawara

Ora bakal bisa ngendhem suwara yen ora diprigeli kang nyata

Wewadine saben wong mesthi ana

Angger dha tumata ing gegayuhane dhewe-dhewe ya ora ana dredah

Dipadha sarujuk tumuju wohing pakarti edi

Idham-idhamane wong urip miguna

Titen-titenan yen sapa sira sapa ingsun ora langgeng

Isih ana sing durung katon temen

Leladi mring sesami kang tulus durung mesthi saben pribadi

Iki ora nlesih nanging mungguwing tata titi gati kang aji

Kadang sutrisna karengkuh merga ana apa upa

Kadarman rasa kang ana uga bisa njalari mulya

Isen-isening ndonya wus maneka warna, mula ayo dha padha mekak jiwa

Gebyaring ndonya ayo di edi peni

Ugemana jatidhiri bangsa kang piniji

Aja njur kepenakke dhewe-dhewe

Sumber : Panjebar Semangat Edisi September 2014

Nguwongake Wong

Dening : Sri Adi Harjono

Jroning kaijenan

Takcoba nggathuk-gathukake bali remuke ati

Kang kocar-kacir pating kececer

Lara rasane...

Sasat maewu kasangsaran bareng sinandhang

Njarem nyengkerem jeroaning jiwa

Otot banyu pepes, rasane lemes

Nanging thelenging batin menyat

Tumuli mesat ndedel awiyat

Gugat marang langit

Kekuwatan apa kang wus ngrampas luhuring bebudenmu

Dhemit endi kang wus ndeder wiji piala ing atimu

Saengga kang biyen sliramu ngrapyak sumanak

Malih dadi anggak, ladak tur galak

Pamitran kang banget aji

Tanpa rasa risih kokcidrani

Gugatku nggugah greget

Ora bakal takrilakake sliramu nyawang aku

Gumlethak dhelak-dhelak

Tanpa daya dadi tontonan kang gawe senengmu

Saiki, ayo bareng-bareng neter waka

Saka ara-ara panguripan iki, ayo padha balapan

Nggolek kodok ngemuli lengen

( aja mbok anggep sepele )

Endi kang dhisik nemokake

Yaiku sing jeneng wong agung

Wong agung ora gumantung

Tumpukane bandha, gedhene panguwasa

Kang wus ngasorake aku, wong mlarat tanpa pangkat

Wong agung kuwi wong kng bisa nelukake dhiri

Wong kang bisa ndadekake wong liya agung

Nguwongake wong

Sumber : Panjebar Semangat Edisi Agustus 2010

Kangen Iki

Dening : Lasmiyati

Ya kangen iki kanggo sapa

Sapa sing ora kangen

Sapa sing ora tresna

Tresna iki ya mung kanggo sapa

Aku wae durung ngerti tresna iki kanggo sapa

Sapa ngerti tresna iki bakal

Nampa piwales kang asih

Sapa gelem nampa tresna iki

Kangen iki ora mung samudana

Kangen iki namung kanggo panjenengan ibu

Ibu ingkang sampun paring katresnan suci

Ibu pasuryanmu lan omonganmu gawe aku eling

Eling marang wejangamu

Wejangan kanggo panguripanku mbesuk

Maturnwuwn ibu kasihmu langka enteke

Taman Geguritan 2

Angele Dadi Satriya

Dening : Toro Kaes

Jare satriya kuwi ...

Ora wedi kelangan sandhangan

Sabab sandhangane satriya mung iman

Jare satriya kuwi ora lumuh

Amarga satriya kudu kuwat

Apa iya satriya kuwi kudu mangkono?

Kok ya angel lakune dadi satriya

Najan iman wis kandel

Kelangan sandhangan isih isin

Merga katon wadine

Najan dikuwat-kuwatake

Ing samubarang gawe

Isih wae nglokro

Merga kere

Satriya apa kudu sugih bandha?

Ya mesthine merga bisa pamer mrana-mrene

Satriya apa kudu putra pajabat?

Ya mesthine merga jare kuwat

... kuwat anggone nindhes rakyat?

  

Kuwung Kang Suwung

 Dening : Ana Septianingrum

Udan riwis-riwis esuk iki

Ndadekake rasa adhem sajroning ati

Ing bagaskara katon ana kuwung

Kuwung nanging suwung

Sing tak sawang saiki

Kuwung ing netramu

Dadu kuwung ing bagaskara kae

Ana sing beda ing netramu

Nanging aku ora ngerti

Senajan ora ngerti

Aku bisa ngrasakake

Ana kuwung ing netramu

Kuwung kang uga suwung

Apa ora kok rasa apa sing tak rasa

Apa ora kok sawang apa sing dadi panyawangku

Apa sing tak rasa lan tak sawang

Dudu mung prekara kuwi

Nanging,

Apa sing kok rasa

Apa sing kok sawang

Uga apa sing kokarepake

Sumber : Panjebar Semangat Edisi September 2014

Taman Geguritan 1

Utopia

Dening : Inggih Sunarto

Pengin dakwiyaki mendhung

Nggoleki kluwung

Dadi gumendhung

Pengin dakjupuki lintang

Kanggo pepadhang

Dadi keplantrang

Pengin daktututi srengenge

Dakcandhet lakune

Dadi tansaya akeh ilange

Dina-dina mlengse

Dhuh kluwung bareng lakune angin

Ilang indahe

Dhuh lintang

Ing awang-awang

Gampang ilang

Dhuh srengenge

Mengulon parane

Ngendi sejane

Napak Tilas

Dening : Sumono Sandy Asmoro

Wengi iki aku wiwit jumangkah

Nyasak dalan sapecak

Napak tilas sikil-sikil atau

Lakuen pendhawa sing klah main dhadhu

Perih iki wohing kajujuran

Sing disebratake dening para

Culika sing ngaku dhadha satriya

Ya iki werdine impen kadaradasih

Nalika kuncarane langit koncatan

Kedhep lintang lan esem rembulan

Wengi iki aku wiwit jumangkah

Napak tilas lakune pendhawa

Kalah main dhadhu

Iki pendadaran sejati

Iki pengumbaran sejati

Tumrap winih kesisih

Sing nintingi werdining perih

Pitakone Wengi

Dening : Tangguh h.w

Memaniking netraku

Nyimpen

Endahe wewayanganmu

Nalika aku lan kowe

Ngronce lintang sumunar

Ing endahe langit

Wengi

Isih keprungu

Cetha nganti wengi iki

Tetembunganmu kang nandhes ati

Mas, apa bisa salawe

Sumber : Panjebar Semangat Edisi Agustus 2010

Sekolahku

Sekolahku…

Rupamu saiki duduk sekolah maneh

Nanging kowe saiki arupa panggonan kang rusuh

Kelas, pekarangan, pada karo kandange petek

                                Sekolahku…

                                Keadaanmu mulai bien ora berubah-berubah

                                Sampa-sampah sing kleleran tetep ora bisa di berantas

                                Kapan keadaanmu iso berubah…nasib…nasib…

Saiki sopo sing bisa di salahake…??

Tukang nyapu-nyapu wis di kerjo professional banget

Clotehan guru wis bekbanget ditokno

Lek ngno murid-e sing salah, ora bisa taat marang aturan

                                Jadwal wis digawekno lan ditempel ndek kelas

                                Kanggo murid supaya ngelasanakno tugas piket_e

                                Ora kanggo pajangan para cecek sing mrambat ndek tembok

                                Amarga iku laksanakno tugase dewe-dewe

Arepan sekolah,Arepan ku pisan

Resik, Enak kanggo belajar…

Murid-murid akeh sing berprestasi…

Kabeh iku arep-arepane sekolah

                                Resik sekolahku

                                Enak belajarku

                                Konsen belajarku

                                Podo moro prestasine.

sumber:

UDAN WAYAH SORE

udan riwis-riwis nggawa angin gumanti

ora kaya nalika kang kawuri sing kebak pangarep-arep

dikaya ngapa lemah wus kebanjur teles

sesuk esuk yen sang surya wiwit sumunar

lan manuk kepodang colat-colot ana wit gedang

tak tunggu tekamu ing sak ngisore payung

tak kanthi lakumu tumeka ngendi

mbokmenawa sesuk sore wus ora udan riwis-riwis

marakake gawe kekesing ati

manuk kepodang wus mabur mangulon

nanging tetep tak tunggu tekamu ***

sumber: